ब्रेकिंग

अर्थ

ट्रम्प टॅरिफ आणि ऑटोमोबाइल उद्योग

Samruddhi Dhayagude
31 Mar 2025

अंतरा देशपांडे

antara@kalyanicapital.com

अमेरिकेत उत्पादन क्षेत्रात रोजगार परत आणण्याच्या प्रयत्नात अमेरिकेत आयात होणार्‍या वाहनांवर २५ टक्के कर लादण्याची घोषणा राष्ट्राध्यक्ष डोनाल्ड ट्रम्प यांनी बुधवारी केली. त्यांनी असे म्हटले आहे की, हे शुल्क पूर्णपणे असेंबल केलेल्या कार आणि इंजिन, ट्रान्समिशन, पॉवरट्रेन पार्ट्स आणि इलेक्ट्रिकल घटकांसह प्रमुख ऑटोमोबाइल घटकांवर लागू होईल. ही यादी कालांतराने वाढू शकते आणि त्यात अतिरिक्त घटक समाविष्ट होऊ शकतात. गेल्या वर्षी अमेरिकेतील कार आणि हलक्या ट्रकची आयात २४० अब्जापेक्षा जास्त होती.

ट्रम्प यांनी दावा केला की, त्यांचे नवीन व्यापार उपाय कायमस्वरूपी आहेत, कर महसुलात वाढ होत राहील आणि उत्पादन नोकर्‍या परत येतील. ट्रम्प यांनी बर्‍याच आधीपासून म्हटले आहे की, ऑटो आयातीवरील कर हे त्यांच्या अध्यक्षपदाचे एक निश्चित धोरण असेल. कारण करांमुळे निर्माण होणार्‍या खर्चामुळे अधिक उत्पादन अमेरिकेत स्थलांतरित होईल; परंतु देशांतर्गत कारखाने असलेले अमेरिकन आणि परदेशी वाहन उत्पादक अजूनही कॅनडा, मेक्सिको आणि इतर देशांवर सुटे भाग आणि तयार वाहनांसाठी अवलंबून आहेत, म्हणजेच नवीन कारखाने बांधण्यास वेळ लागल्याने वाहनांच्या किमती वाढू शकतात आणि विक्री कमी होऊ शकते.

टाटा मोटर्स, आयशर मोटार्स, सोना बीएलडब्ल्यू आणि संवर्धन मदरसन यांसारख्या भारतीय कंपन्या या करामुळे चर्चेत आहेत. या कंपन्या युरोप, जपान, दक्षिण कोरिया आणि चीनला ऑटो कंपोनेंट निर्यात करतात, जे अखेरीस अमेरिकेला वाहने पुरवतात.

टाटा मोटर्सची अमेरिकेत थेट निर्यात होत नाही; परंतु त्यांची उपकंपनी जग्वार लँड रोव्हरची अमेरिकेच्या बाजारपेठेत मोठी उलाढाल आहे. जेएलआरच्या ऋध२४ च्या वार्षिक अहवालानुसार, त्याच्या एकूण विक्रीत अमेरिकेचा वाटा २२% होता. ऋध२४ मध्ये जेएलआरने जगभरात सुमारे ४००००० वाहने विकली, ज्यामध्ये अमेरिका त्याच्या शीर्ष बाजारपेठांपैकी एक आहे, असे अहवालात म्हटले आहे. कंपनीची अमेरिकेत विकली जाणारी वाहने प्रामुख्याने यूके आणि इतर आंतरराष्ट्रीय प्लांटमध्ये उत्पादित केली जातात, ज्यावर आता २५ टक्के कर आकारला जाईल.

रॉयल एनफील्ड मोटारसायकलींची निर्मिती करणारी आयशर्स मोटार्स देखील याचा परिणाम अनुभवू शकते. कारण अमेरिका त्यांच्या ६५०लल मॉडेल्ससाठी एक महत्त्वाची बाजारपेठ आहे.

भारतातील आघाडीच्या ऑटो कंपोनंट उत्पादकांपैकी एक म्हणून, संवर्धना मदरसन इंटरनॅशनल लिमिटेडचा युरोप आणि अमेरिका दोन्ही ठिकाणी चांगला जम आहे. ते टेस्ला आणि फोर्डसह प्रमुख अमेरिकन वाहन उत्पादकांना सुटे भाग पुरवतात. मात्र, केवळ निर्यातीवर अवलंबून असलेल्या कंपन्यांपेक्षा या कंपनीची अमेरिका आणि युरोपमध्ये स्थापित उत्पादन युनिट्स असल्याने कंपनी आयात शुल्काच्या प्रभावापासून तुलनेने संरक्षित आहे.

सोना कॉमस्टार ऑटोमोटिव्ह सिस्टीम आणि घटकांचे उत्पादन करते, ज्यामध्ये डिफरेंशियल गिअर्स आणि स्टार्टर मोटर्सचा समावेश आहे. कंपनीला तिच्या उत्पन्नापैकी सुमारे ६६ टक्के उत्पन्न अमेरिका आणि युरोपीय बाजारपेठेतून मिळते. जोखीम कमी करण्यासाठी, सोना बीएलडब्ल्यू चीन, जपान आणि दक्षिण कोरियामध्ये विस्तार करून आपल्या निर्यात बेसमध्ये विविधता आणत आहे, ज्याचे उद्दिष्ट पाच वर्षांत या पूर्वेकडील बाजारपेठांना त्यांच्या महसुलात ५० टक्क्यांहून अधिक योगदान मिळवणे आहे. निर्यातीत लक्षणीय वाढ असलेल्या इतर प्रमुख घटक उत्पादकांमध्ये भारत फोर्ज, संसेरा इंजिनिअरिंग लिमिटेड, सुप्रजित इंजिनिअरिंग आणि बालकृष्ण इंडस्ट्रीज यांचा समावेश आहे.

डोनाल्ड ट्रम्प यांनी हा २५ टक्के कर लावण्याचा फतवा काढला आहे; मात्र ट्रम्प व्यापार धोरण २ एप्रिल २०२५ रोजी जाहीर केले जाईल, तेव्हा नक्की काय ते स्पष्ट होईल. त्यामुळे सगळ्या व्यापार वर्गाची, शेअर बाजाराची आणि कंपन्यांची आता २ एप्रिल २०२५ कडे आस लागली आहे.